MWENDESHA BAISKELI AMUOMBA RAIS SAMIA SIKU YA KIFO CHA MAGUFULI KUWA YA MAPUMZIKO

Mwendesha Baiskeli John Agustino Shayo akiwa  mjini Singida. Machi 6, 2024 akielekea Chato kwa ajili ya kushiriki Maadhimisho ya miaka mitatu ya  kifo cha aliyekuwa Rais wa Jamhuri ya Muungano wa Tanzania Hayati Dkt. John Pombe Magufuli.

Mwendesha Baiskeli John Shayo akiwahamasisha vijana mjini Singida kuwa wazalendo na kumuenzi Hayati Dkt. John Pombe Magufuli kwa kufanya kazi kwa bidii na kudumisha upendo, mshikamano na amani.

................

Na Dotto Mwaibale, Singidani Blog

Mwendesha Baiskeli John Augustino Shayo ambaye yupo safarini kuelekea Chato akitokea Dar es Salaam ameendelea kumuomba Rais Samia Suluhu Hassan kuifanya siku ya kumbukizi ya kifo cha Hayati Rais wa Awamu ya tano Dkt. John Pombe Magufuli aliyefariki Machi 17, 2021 iwe ya mapumziko.

Shayo akizungumza na waandishi wa habari mkoani Singida wakati akiwa katika safari yake hiyo  ya kuhamasisha umoja, mshikamano, amani na kufanya kazi kwa bidii kwa ajili ya kumuenzi Hayati Rais John Magufuli alisema pamoja na uhamasishaji huo lengo lake kubwa ni kwenda kujumuika na familia ya Magufuli katika kilele cha maadhimisho ya miaka mitatu ya kifo chake na kupeleka ujumbe huo wa kumuomba Rais Samia kuifanya siku hiyo kuwa ni ya mapumziko kwa kuzingatia kuwa Hayati Magufuli ni Rais wa kwanza hapa nchini kufariki akiwa madarakani.

“Maono yangu ya kusafiri kwa kuendesha baiskeli kwenda Chato kwa ajili ya kuhamasisha jambo ili na kumuomba Rais Samia kuifanya siku hiyo kuwa ya mapumziko niliyapa tangu mwaka jana lakini nilishindwa kufanya hivyo kutokana na mambo kadhaa yaliyokuwa nje ya uwezo wangu zikiwepo fedha za kujikimu nikiwa safarini,” alisema Shayo.

Shayo aliwashukuru watanzania ambao wamemuwezesha kumsaidia kwa namna moja au nyingine kwa kufanikisha safari hiyo ambapo ameendelea kuwaomba waendelee kufanya hivyo ili aweze kupata maji, chakula, biskuti na glukosi na mahitaji mengine akiwa safarini.

Aidha, Shayo amewataka vijana waendesha baiskeli wa Igunga, Shinyanga, Mwanza, Geita, Katolo na maeneo mengine ya Kanda ya Ziwa watakao kuwa tayari kuungana naye kuelekea Chato kwa ajili ya uhamasishaji huo wawasiliane naye ili waweze kupanga eneo la kukutana.

Shayo alitumia nafasi hiyo kuwaomba watanzania watakao kuwa tayari kumsaidia kwa fedha ya chakula wakati akiwa safari wanaweza kumtumia kupitia namba ya simu 0789-060614 pia wanaweza kumtumia ujumbe mfupi wa njia ya simu kwa mawasiliano zaidi.

---ANGALIA VIDEO CHINI---