SERIKALI KILOSA YACHUKUA TAHADHARI YA MAFURIKO

Mkuu wa Wilaya ya Kilosa Shaka Hamdu Shaka akizungumza wakati walipotembelea waathirika wa mafuriko yaliyotokea jana Machi 17, 2024 wilayani humo ambapo Kaya zaidi ya150 zimeathiriwa.

...........................

Na Dotto Mwaibale (Singidani Blog)

SERIKALI Wilaya ya Kilosa mkoani Morogoro imechukua  tahadhari zaidi ili kuwafanya wananchi kuwa salama baada ya kukabiliwa na mafuriko yaliyosababishwa na mto Miombo kujaa maji kutoka milimani.

Mkuu wa Wilaya ya Kilosa Shaka Hamdu Shaka akizungumza na waandishi wa habari kwa njia ya simu Machi 18, 2024 alisema zaidi ya kaya 150 zimeathiriwa na mafuriko hayo yaliyotokea jana Machi 17, 2024.

“Tunaendelea kuchukua tahadhari ili kuepusha madhara zaidi kwa wananchi kwani bado maji yanateremka kutoka milimani kufuatia mvua kubwa iliyonyesha jana,” alisema Shaka.

Shaka alisema kufuatia mafurika hayo mawasiliano ya barabara kati ya Mikumi na Kilosa yamekatika na sasa wanajenga kivuko cha muda ili kisaidie kurahisisha usafiri wakati ujenzi wa daraja jipya kubwa la kisasa likianza kujengwa na Wakala wa Barabara za Vijijini na Mijini (TARURA) baada ya Rais Samia Suluhu Hassan kutoa Sh.Bilioni 1 kwa ajili ya kazi hiyo.

“Tuna kila sababu ya kumshukuru Rais wa Jamhuri ya Muungano wa Tanzania Dkt. Samia Suluhu Hassan kwa kutupa fedha za ujenzi wa daraja hilo ambalo litakuwa likipitika wakati wote na kuinua uchumi wa wananchi wa Kilosa na Mikumi na maeneo mengine,” alisema Shaka.

Shaka alisema tahadhari nyingine wanayoendelea kuichukua ni kudhibiti magonjwa ya mlipuko ambayo yanaweza kutokea kutokana mafuriko hayo.

Alisema awali Serikali ilipanga waathirika wote wa mafuriko hayo wapewe hifadhi katika moja ya shule lakini familia zao ziliomba ziwape msaada huo.

Mara baada ya kutokea mafuriko hayo DC Shaka pamoja na Wajumbe wa Kamati ya Ulinzi na Usalama walifika maeneo ambayo yalikumbwa na mafuriko kujionea hali halisi na kuchukua hatua za awali za kuwasaidia waathirika.

Aidha, DC Shaka na wajumbe wake hao walifika eneo la  daraja linalounganisha vijiji  vya Nyali na Nzumbo ambalo limechukuliwa na maji na kusababisha huduma za usafiri kusimama.

Wakiwa kwenye eneo hilo walijikuta wamezingirwa na maji hivyo kulazimika kuanza kuondoka kujinusuru huku wakitoa msaada kwa wananchi wengine ambao walikuwa wamekwama kwenye makazi yao.

Mafuriko hayo yameharibu miundombinu ya madaraja, barabara na makazi ya wananchi ambapo kaya zaidi ya 150 zimeathiriwa kwa kuzingirwa na maji.

Meneja wa TARURA Wilaya ya Kilosa, Wiston Munyega, akizungumza wakati walipotembelea maeneo yaliyokumbwa na mafuriko hayo.Mkuu wa Polisi wa Wilaya ya Kilosa (OCD) Hassan Selego akipita kwenye mafuriko wakati wa kutembelea maeneo yaliyo athirika kwa mafuriko.Muonekano wa mafuriko hayo.