MHANDISI TIA SINGIDA : WANAFUNZI TUMIENI FURSA YA UJENZI MRADI WA JENGO LA TAALUMA KUFANYA VIBARUA

Mhandisi TIA Singida, Godfrey Seni akizungumza na wanafunzi wa mwaka wa kwanza wa Tasisi hiyo.

..............................

Na Dotto Mwaibale, Singida

MHANDISI wa Taasisi ya Uhasibu Tanzania (TIA), Kampasi ya Singida, Godfrey Seni amewataka wanafunzi wa Taasisi hiyo kutumia muda wao wa mapumziko kufanya vibarua katika mradi wa ujenzi wa jengo la taaluma ili kujipatia fedha za kujikimu chuoni hapo.

Seni aliyasema hayo wakati akizungumza na Wanafunzi wa mwaka wa kwanza ambao wanaanza msimu wa masomo wa 2025/ 2026  ‘Orientasion for First Year Students’ katika kikao kilichofanyika Novemba 20, 2025.

“Wanafunzi katika chuo chetu kuna mradi ambayo unafanyika baada ya Serikali kutupa fedha nawaombeni mnapokuwa kwenye mapumziko baada ya masomo njooni kufanya vibarua ili muweze kujipatia fedha za kuwasaidia badala ya kwenda kuzurura mitaani,” alisema Seni.

Seni aliwaambia wanafunzi hao kuwa katika kampasi hiyo Serikali imetoa fedha Sh. Bilioni 13.5 kwa ajili ya ujenzi wa jengo la taaluma hivyo watumie fursa hiyo kwa kufanya vibarua na kujipatia fedha jambo litakalo wasaidia wazazi wao wasiangaike kuwatafutia fedha za matumizi.

Alisema jengo hilo litakuwa la ghorofa tano likiwa na kumbi za mihadhara, madarasa, kumbi za mikutano pamoja na ofisi na hadi kukamilika litatumia Sh. Bilioni 16.

Katika hatua nyingine Seni aliwataka wanafunzi hao kuitunza miundombinu mbalimbali iliyopo chuoni hapo ili iweze kudumu na wanafunzi wengine waje waikute kama walivyo ikuta.Wanafunzi wakimsikiliza Mhandisi wa TIA Kampasi ya Singida, Godfrey Seni.